Auroru barst beiðni fyrir nokkru síðan frá God’s Will Academy Junior Secondary School skólanum í Lunsar um að útvega tölvur fyrir skólann. Við ákváðum að svara kallinu og afhentum skólanum tölvur við viðhöfn í gær. Alls voru gefnar 7 borðtölvur, mýs og lyklaborð, ásamt 8 tölvuskjáum til skólans þar sem eru þrír bekkir og 10 kennarar en skólinn er í bænum Lunsar.
Ásamt starfsfólki skólans og börnunum voru viðstödd afhendingarathöfnina aðilar á vegum bæjarins og annarra félagasamtaka. Skólastjóri og stofnandi skólans tók við gjöfinni fyrir hönd skólans og Auroru þykir vænt um að geta aðstoðað með þessum hætti. Við vonumst til að skólinn nýti gjöfina sem best sér til góðs og munum við fylgja gjöfinni á eftir til að sjá hvenig hlutirnir þróast!
Við fengum senda þessa mynd með þeim fréttum að tölvurnar séu komnar í notkun af nemendum skólans!
