Í febrúar 2019 var LSP keramikverkstæðið formlega opnað og nú, tveimur og hálfu ári seinna, getum við með stolti tilkynnt að við höfum skrifað undir fimm ára samstarfssamning við SLADEA (Sierra Leone Adult Education Association) vegna áframhaldandi uppbyggingar keramikverkstæðisins í Waterloo, rétt fyrir utan höfuðborgina. Þetta er þriðji samningurinn sem Aurora og SLADEA undirrita um samstarf frá árinu 2019 og sá lengsti hingað til.
Á síðustu árum hefur verkstæðið hlotið allsherjar yfirhalningu, sem hefur m.a. falist í endurnýjun á brennsluofnum og er nú teymi á staðnum sem sér um daglegan rekstur. Með nýja samstarfinu er markmiðið sett á að endurnýja tækjakostinn ennfrekar með það fyrir augum að bæta framleiðsluferlið og getuna til að auka framleiðsluna og ekki síst minnka líkamlegt álag á starfsmönnum setursins. Aurora hefur hlotið styrk frá Utanríkisráðuneyti Íslands til þess að fjármagna stóran hluta verkefnisins. Næstu fjögur ár verður unnið að því að undirbúa verkstæðið smám saman undir það að verða alveg sjálfstætt og geta staðið á sjálfbæran hátt undir sér.
