Stjórn Auroru hittist loks í eigin persónu nú í ágúst – eftir að hafa einungis fundað á TEAMS undanfarin tvö ár!
Fundurinn stóð í tvo daga og ræddi stjórnin bæði þróun Auroru undanfarin tvö ár og lagði línurnar fyrir næstu árin. Stjórnin velti upp þróun einstakra verkefna undanfarið, einkum í ljósi aðstæðna en heimsfaraldurinn hefur vissulega haft áhrif í Sierra Leone eins og annarsstaðar. Niðurstaðan var ansi jákvæð og var stjórn ánægð með hvernig starfsfólk Auroru hafi tekst að halda góðum dampi í verkefnum á þessu erfiðum tímum. Fyrir komandi ár er stjórn Aurora metnaðarfull fyrir hönd Auroru og væntir mikillar grósku í öllum núverandi verkefnum og áhugi er á að skoða áframhaldandi tónlistarverkefni á næstu árum.
Áður en almenn fundastörf hófust hélt Aurora aðalfund þar sem farið var yfir ársreikning og ársskýrslu fyrir árið 2020 og breyting var gerð á stjórn. Birta Ólafsdóttir lét af stjórnarmennsku eftir 7 ár í stjórn. Aurora er einstaklega þakklát Birtu fyrir hennar mikla framlag til Auroru, einkum hönnun og uppsetning á skrifstofu Auroru í Sierra Leone, en einnig hefur hún stutt við framkvæmdastjóra á ýmsum sviðum í gegnum tíðina. Við óskum Birtu velfarnaðar í sýnum störfum og þökkum henni kærlega fyrir!
Nýr stjórnarmaður tók við sæti Birtu, það er Ólafur Orri Ólafsson og erum við spennt að vinna með honum í framtíðinni. Hann þekkir störf Auroru vel og hefur komið nokkrum sinnum til Sierra Leone og þekkir því til þar einnig. Velkominn til starfa Ólafur Orri Ólafsson!
